Устав преподобного Ефросина Псковского чудотворца

15 Апреля 2016

1. ПРЕПОДОБНОГО ЕФРОСИНА

ПСКОВСКГО ЧУДОТВОРЦА

ИЗЛОЖЕНИЕ ОБЩЕЖИТЕЛЬНОГО

ПРЕДАНИЯ[1]


Устав обители тресвятительския, в державе Государей Великих Князей Василия Васильевича, и сына его Иоанна Васильевича, по благословению митрополита Феодосия Богоспасаемаго града Москве, и Преосвященнаго Архиепископа Евфимия, великих градов Новагорода и Пскова в области Святыя Живоначальныя Троица, в Псковской земли над Толвой рекой, Кир Отца старца Евфросина, зовомаго Елизар [Имать в себе глав тридесять]. «Се аз грешный во иноцех раб Божий Евфросин, в беззаконии зачат есмь и во гресех роди мя мати моя, Божиею благодатию и Его [велми] неизреченными судьбами, якоже Сам рече: «Не хощу смерти грешнику» (Иезек. 33;11)[2], сподоблен бых паки родитися святым крещением по словеси, его же рече Никодиму. «Аще кто не родится водою и духом, не внидет в царство небесное» (Иоан. 3;5). И того ради нарекохся христианин. Възрастох ж в всякой слабости, и в небрежении о Божиих заповедех. Но премилостивый Бог, хотя всем человеком спастися и в разум истинный приити, сподоби мя Ангельскаго образа, его же не бех достоин, во обители Рождество Пречистыя Богородицы, еже именуется по месту Снетая гора. И видех чин и житие их добродетельное и жестокое. Аз же слаб есмь и немощен, и грех ради моих, прииде ми ин помысл или от Бога или от спротивнаго, един Бог весть, изыти от тоя честныя обители и сести особь, где, идеже Бог укажет, да не сблажняю братию единомысленно служащую Богу, и явих помысл свой духовному отцу; он же, видя мою леность, повелел ми ити и благослови мя. Аз же грешный по сказанию и по званию раб Божиих, иже мною грешным печахуся, приидох на сие место, еже есть над Толвою рекою, и ту седох. Диавол же не хотя никому же добра, нача людем безумным и маловерным во ум влагати, яко он сий чернец из великия обители пришед, седе един и есть у него много серебра, и шедше убием его, а сребро собе возмем; и благовернии же людие приходяща начата поведати то нам, мы грешнии того вельми бояхомся, аки вси человецы, плетуще помышления своя. И начаше же братия присовокуплятись, аз же грешный не хотех мнозе братия молвы ради и многаго мятежа, но помянух Господне слово, еже рече: «Приходящего ко мне не иждену вон» (Иоан. 6, 37). И паки рече: «Идеже суть собраны два или трие о имени моем, ту есмь посреде их». (Мф. 18; 20). Паки рече Дух Святый усты Давидовы: «Се коль добро, и коль красно, еже жити братии вкупе». (Псал. 132; 1). И паки Списатель Божественныя Лествицы рече: «Горе единому, иже аще падется, несть кто вставляй в его человецех». Тем же и аз грешный убояхся Господня Заповеди преслушатися и нахождения злых человек. И начах приимати братию, и жити с ними за едино и ясти и пити вкупе за единою трапезою всем, по преданию, еже от Ангела Пахомию. И потом принудила мя братия церковь соградити, и бысть церкви во имя святых триех Святитель, Василия Великаго, и Григория Богослова, и Иоанна Златоустаго. Но молюся вам, братия, Господа ради, молите Бога и святых Святитель о мне грешнем, негли молитвами святых и вашими Бог бы простил на таковое и великое дело дерзнувша, его же не бех достоин, точию должен есмь безпрестани плакати своего согрешения многаго, зане же пишет святый Сидор Постник, сице рквы (рекии): «Безпрестани вопиющи на тя к Богу, но надеяхся на щедроты Божия, занеже Давыд рече: Аще не Господь созиждет дому всуе трудищася зиждущии (Псал. 126, 1). И сам пакы рече: «Без мене не можете творити ничтоже». (Иоанн. 15; 5). Ино Божием строением и молитвами святых Святитель и усердием братий, тогда ту живущих, бысть Церквы, и монастырь общий святых Святитель. Известно же буди вам, братие: слышахом от святых Отец от древле нас бывших, якоже Пахомий, и Евфимий Великий и Феодосий, Савва Иерусалимский и прочии велиции, иже который начало сотворил и в коем любо месте, и братию совокупил и монастырь составил, туже и ктитор именовался и устав свой положив о житии и о пребывании донележе и монастырь стоит, и братия пребывают на том месте, и не уступаются никтоже в монастырския вещи, и в той же устав, ни от Святитель, ни от Князя и никтоже от держащих кую любо власть и сан, аще и на благое дело; по совету же Настоятеля того места. Мне же грешному и убогому и унылому, отвсюду тесно ми есть; написати бы, но боюся, яко смысла и добродетели нимало коснухся, и еще злая творя не престаю. Обличает бо мя Богоотец Давид глаголя: «Грешнику рече Бог: «Почто ты поведаеши оправдание Мое и приемлеши завет Мой усты твоими? Ты же возненавидел наказание Мое и отверг же словеса Моя вспять» (Пс. 49; 16– 17) и прочее. И не писати бы, но сам Господь глаголет: «Рабе ленивый и лукавый, почто скрыл еси талант мой в земли? Обаче лениваго раба вверзите в пещь огненну, идеже будет плач и скрежет зубом». (Мф. 25; 26– 30). Но не веде что створю, не вместитмися слово, занеже ни учитель, ни прозвитер еемь саном, но точию уповаю на щедроты Господня и на молитвы святых Святитель, и усердием братии моей, негли простит мя Господь, дерзкаго дела моего, егоже не бех достоин, обаче начну, веруя Господу. Аще в осля Валаамово слово вложи, обличая безумие его; из бездушнаго камени воду источи непокоривым людем, силен есть и мне грешному дата слово своея ради благости и спасения ради братии моея, Бога ради ту живущих.


1. О стяжании

И се аз грешный Евфросин инок, пишу вам, братия моя, от начала святыя сея Церкви, да будет монастырь общий, дондеже Господь произволит в маловременной сей жизни. Хотящий же жити от братии в худой сей обители, да смотрят и почитают и послушают сих святых правил. Правило пятаго святаго собора, святых Отец о общем житии: мнихом ничтоже подобает своего имети, но все свое предавати монастырю на власть. Рече Богогласный Лука о веровавших Христу, и монашеское житие уставившим: «Яко ни един кто что от своего глаголаше его быта, но беша всем обща». (Деян. 4, 32). По стрижении же впадающим к нему в руце все монастырю даяти, ни о чем же своем пещися или рядити сим попущается. Аще часть сребра Анание уем от своих же, и не всего у ног Апостольских положив, напрасно (внезапу) пад умре. Что подобает рещи о тех, иже не всего себе приносяще Богови, но часть убо приносяще Богу, часть же своим похотным работающу, их же обрящет горынее томление, якоже сильну суще Богу душу и тело в геоне погубити. Иже в иноческий святый образ одени в монастырех общих, ни словом леть рещи: се твое, а се мое, или сего или иного. Ибо 5000 суще простьци вся обща имеяху, никто же своего что быти веща, боле паче в общем житии, в монастыри не нарицати: Се твое, а се мое.


2. О ястии и питии

Ни ясти ни пити опроче трапезы, разве нужныя болезни. Гдеже суть от плевел сеющего диавола, взрастыша в общем житии, глаголемыя и тарица, еже есть особина, или мало или велико не достоит нарицати общих, но разбои[ник седалища и священнокрадения, и вся злобы и неприязни сделницы. Сего бо ради наречется общее житие.


О имениих

Да все общее имут. Глаголет убо Великий Василие: «Яко имеяи что в общем жити в монастыри в келии своей или мало или велико чужа себе божия церкви створи, и господня любве таковый чуж есть. Полезне убо есть с малыми разумными житие неже с многими бещинными преобидящими заповеди господня». Аще же и святый Григорие Двоеслов страшнее пишет глаголя.


О сребре и злате

Аще обрящут в келии у которого инока у живаго или от сребра или от злата да сжгут ему на главе его. Аще ли же по смерти да не погребут того инока в монастыри, но вон извлещи и в яму засыпати, и обретенное с ним положити и рещи: «Злато твое или сребро да будет в погыбель с тобою», и не проводити его ни поминати его. И в Старчестве пишет: «Иже близ некоего монастыря брат наедине живый преставися. Игумен же келью его повеле превозити в монастырь. Разорше храмину, ту обретоша грнец злат. Игумен же рече: «Аще жив не яви сего, никому ж ни преставливаяся, то вложите с ним в гробе». И по многы дни видеша огнь горящь над гробом его». Видите ли, братие, како прежде страшнаго суда тело его огнем горяше, что имать пострадати душа тая, по страшнем суде Господни. Не держите ничего ж особины в общине. Аще ли кто не может в том преданьи святых Отец тако жити, да не входит первое в такую обитель: страшно бо впасти в руце Бога жива. Рече Павел апостол: «И егда тленных и маловременных ради душу нетленную погубим, за ню ж сам Христос пострада страсти и честну свою кровь пролия». Мы ж поминаем его рекша: «Аще и всего мира приобрящете богатство душу свою отщетим, что дамы измену за душу свою». Аще израильтяном дай бысть ветхий закон, еже есть стень нынешнему Христову закону, и в том ветхом законе жившая в пустыни толик народ препита, еже есть шестьсот тем опречь жен и детей манною с небеси четыредесять лет корми, еже и Давид рече: «Хлеб ангельскый ясть человек», и вся та лета ни риза на них не раздрася, ни са]пози, кольми паче нас не оставит уповающих на щедроты его. Сам бо рече: «Аще имате веру яко зерно горошично» (Мф. 17, 20), но речете горе сей двигнися и верзися долу, и послушала бы нас; кольми паче еще сохраним сию заповедь его. Мы ж, грешнии, не манну, но самого Христа тело и честную Его кровь приимающе, како не устыдимся, ни усрамляемся, преступающе заповеди Его, еже рече: «Не стяжите ни злата ни сребра» (Мф. 5, 3). И паки рече: «Блажени нищии духом, яко тех есть царство небесное» (Мф. 3, 3). Но и тех жидов невернейши есмы и горше онех злая приимем.


3. О Игумене

Вы же, братие, зде живущие, ищите убо собе Игумена богораднаго, добреразумного, и духовна человека и искусна, о всем послушество имуща от своего добродетельного жития. Иже сътворит и научит сей велий наречется в Царствии небеснем (Мф. 5, 19). Рече бо блаженный Антиох: «Имя бо просто не введет в царствие небесное, ни слова бездельно (без дела или без исполнения) не пользует слышащему». Начать бо Иисус прежде творити, потом же учити, и рече о сем разумети есть (Деян. 1. 1).


4. О наемном Игумене

Аще кто Бога ради желает жити и о словесных овцах попечение имети, то не ищет найма по реченному от Господа, яко наемник есть нерадит о овцах (Иоан. 10. 13); Ни ризы светлейшия и мягчайшая любит: мяккая бо носяще в домах царских суть; ни брашна сладчайшая: несть бо раб выше господина своего, ни учьник выше учителя своего. Аще сам Господь и учитель не отречеся тебе ради оцта и желчи вкусити, и рече: «Будет раб яко господь его, и ученик яко учитель его» (Мф. 10, 25). «Да где же аз буду, – рече, – ту и слуга Мой будет» (Иоан. 12, 26). Тако же, поведают книгы и о Василии Великом отнеле же прият крещение, не вкуси ничтоже разве хлеба и воды. Тако и нам предает, рекый, начало житию человечу хлеб и вода Помазанник убо Божий Давид, аще Царь и в славе велице живый, что рече: «Пепел яко хлеб ядях и питие мое с слезами черпах» (Псал. 101, 10). Мы же точию не токмо хлеб ядущи, но смотряще в устав преданный от святых Отец, еже есть царский путь, не свратися, рече ни на десно, ни на лево; но по всему равно с братиею. Аще ли ж найма ищет, то уже таковый не Богу хощет служите, но сребру, еже есть, мамоне неправедному, по Господню слову: «Идеже сокровище ваше, ту будет и сердце ваше, и не может Богу работати и мамоне неправедному» (Мф. 6, 21, 24). Апостол же Павел рече: «Имуще пищу и одежду сим довольни будем» (Тимоф. 6, 8). Паки ж рече Господь: «Добрый пастух душу свою полагает за овца, а наемник, емуж не суть овца поручений, егда видит волка, оставляет овца и бегает, яко наемник есть и не радит о овцах» (Иоан. X.). По сему ж разумети есть, который Бога ради хощет единомысленно служите Богу и святей церкви, да не емлет ничтоже лише братий, и все данное ему в руце от человек, дает святей церкви и братии на потребу. Тако бо святой апостол Павел пишет к Ефиссем: «Помните, – рече, – яко три лета не почих день и нощь с слезами уча единаго когожде в вас; сребру или злату или ризам ни единому же восхотех; сами весте, яко требованию моему, и сущим со мною послужисте руце. Сия вся сказах вам, яко тако тружающеся подобает подимати немощныя». Також Игумен образ да бывает стаду всего правдою и житием святым, преподобие и праве дне живый, сблюдая, елика суть законна и благоговейна Длжен убо есть учитель вас умом и оком быти, и б дети о стаде своем, яко хитрый врач огради щитом[3]... Иный сверши упованием, еже в Христа. Обуй нозе Евангельскыми учении и препояши чресла целомудрия словесы, даждь меч в руце на страсти ярость остру и противитися полку страстей и сласти росто рещи: всякыми делы благими украшена; також и иноцы вси должны суть быти, да он с дрзновением речет, на страшном суде: «Се аз и дети, еже ми еси дал». Обретосте ли такова, то уже не скоръбите: обретосте бо путь спасения.


5. О предании воли Игумену своему

Предайте же ся ему и всю волю свою отсек мечем слова Божия, еже рече сам Христос: «Не снесох мира на землю, но меч и рать» (Мф. 10, 3, 4). Подобает же и нам, братие, не ослушливом быти, но вся повеленная творити, и яко от Бога приимати, якоже сам рече святым апостолом: «Слушаяй вас, мене слушает, и отметаяйся вас, мене ся отмещет» (Лук. 10, 16). И сии суть наместницы апостольстии, и сего ослушанием самаго Бога отметаемся. Коль зло есть ослушание! Сам же Христос послушлив бысть до смерти, смерти же и распятью. Вторая бо лествица есть на небо послушание, и паче постнаго и пустыннаго труда: Ангел бо Господень ходит сзади послушающего и считает стопы его, и приносит на всяк день к Богу, аки воню благоухания. Аще ли каплю пота его, то аки мученическую кровь приносит. Тако Иоанн Богослов пишет: «Любяй брата, Бога любит; не любяй брата, Бога не любит. Аще кто речет Бога люблю, а брата своего ненавижу ложь есть» (Иоан. 4, 20). Сам Господь рече: «Больша сия любви никто же не имать, да кто положит душу свою, за други своя» (Иоан. 15, 13). Аще сам Христос за нас положи душу свою, длжны есмы и мы душу свою полагать за братью свою. Се яве есть яко служащий братьи, Богу служим.


6. О службах братии

Сам бо рече: «Аще кто мне служит, почтет и Отец мой» (Иоан. 12, 26); «ибо Сын человеческий не прииде, да послужат ему, но да сам послужит и даст душу свою избавление за многы» (Мф. 20, 28). Не токмо иже воплотивыйся нашего ради спасения, и ногы учеником умы и страсти претерпе и изведе нас от тмы на свет, но и ныне по вся дни служит нам: еже твари всей велит кождо свой чин строити; небо росит, земля же плодорастит; солнце в день сияет, луна же в нощи; вода рыбу плодит, воздух птица съдеръжит. Чтож рекоша трие отроцы? «Благословити вся дела (Господня) Господа» (Дан. 3, 37), и Давид: «Всяко дыхание да хвалит Господа» (Псал. 150, 6). Что же мы противу Богу въздаем, или что требует? Всяко егова суть. Но что Давид рече: «Жртва Богу дух съкрушен, сердца сокрушенна и смиренна Бог не уничижит» (Псал. 50, 19). Должни бо есмы с чистотою и скрушением сердца и смирением служити, яко Богу, Игумену и всей братии, и не леновати ни о чем же, яко Божие дело есть; все бо монастырские Богу освящено есть, и велице подлежит беде леностне служа, и яко Бога преобиде. «Елма бо створисте единому сих мне створисте» (Мф. 25, 40). Аще убо прилежне, аще леностне кто служит, к Богу восходит служение его. В истинну убо глаголаше Иеремия о леняющихся: «Проклят человек, творяй дело Господне леностне». Мы же, братие, кроме клятвы суще, благословения внутрь, яко служители Христовы, всем прилежанием и тщанием служение свое изветствуем, да благословение наследуем, яко ученицы благословеннаго, рекущаго: «Идеже есмь аз, ту и служитель мой будет» (Иоан, 12, 26). Разумеем и мы, братие: сами Апостоли и столпи церковнии с кацем подвигом и любовию служаху сущим в Иерусалиме нищим. Паки рече Павел: «Аще кто не делает, да не яст» (Сол. 3, 10). Також и преподобный Отец наш Ларион рече своим учеником: «Руце наши могущей нас крмити на осуждение нам будут; опаство ж много предано бысть нам сего; некому же преставльшемуся... вложити с ним в гроб и по многи дни видеша огнь горящ над гробом его. Видите ли, братие, како преж страшнаго суда тело его огнем горяше. Что имять пострадати душа тая по страшнем суде Господни». И молюся вам, братие, не кощуны се помышляйте и бойтеся того и не држите ничесоже особины в общине. Аще же кто не может в том предании святых Отец тако жити, да не входит первое в такую обитель. «Страшно бо власти в руце Бога жива» (Евр. 10, 31), – рече Павел апостол. И егда тленных и маловременных ради душу нетленную погубим, занюже сам Христос страсти пострада, и честную свою кровь пролия. Мы ж поминаем Его рекша: «Аще и всего мира богатство приобрящете, душу свою отщетим, что дамы измену за душу свою» (Мф. 16, 26). Аще и Израильтяном дан был ветхи закон, и в еже есть степень нынешнему Христову закону, и в том ветхом законе жившаа в пустыне толик народ препита еже есть (600) тем, опрочь жен и детей манною с небеси (40) лет корми. Еже и Давид рече: «Хлеб Ангельский ясть человек» (Псал. 77, 25). И вся та лета ни риза на них не раздрася. Писано о сем от святых Отец, яко да от праведных трудов и своего делания дневную пищу и прочая нуждная и потребная телеса [телеси], Господь и пречистая Его Мати яже о нас устроит.


7. О наемном деле

Стяжание чужих трудов вносите каково любо отнюдь несть на пользу нам, и паче же яко страстнии душею и немощнии приимати к обители, но яко яд смертоносен отбегати и отгоняти.


8. О потребах

Аще ли оскудеет потреба телесная на искушение нам, не рци человеку: даждь ми. Лучше уповати на Господа, неже на человека, и нужных искати со Христом поминающе Павла апостола, еже к Ренфеем (Коринфяном) пишет сице: «Мы ж до нынешняго часа алчем и жаждем, и наготуем, и страждем, и скитаемся, делающе своими руками, и укаряеми благословим; гоними удржимся; хулими молимся, яко отреби мирови быхом, всем попрание доселе. Не срамляя вас пишу сия, но яко чада моя возлюбленная наказуя» (1 Кор. 4, 11–13). И якоже в другая времена святым Апостолом класье стирающе ясти (Мф. 12), а иже по Христе хождаху народи мнози, яко 5000 разве жен и детей, что имеяху разве 5 хлебов и две рыбы. И взрев Иисус на небо и благослови и от того насыти весь народ, и якоже избытися укрух 12 кошниц, яже и доныне благодатию Христовою съхранени суть в Цареграде на показание последнему роду сему (Мф. 14). Чтож реку о Ильи пророце, иже предкрми его вдовица убогая, от единой гръсти муки и от единаго водоноса воды, и от единаго чванца масла. Не токмо ж единаго пророка препита, но и сама и чадо ея три лета и 6 месяц (3 Царств, 17). И сам Христос рече: «Не о хлебе едином жив будет человек, но всяком глаголе, исходящем из уст Божиих» (Мф. 4, 4). Силен бо есть и мощен яко же тогда и ныне прекормити нас, яко же и Израильтян прекръми на пустыни 40 лет; такоже и ныне не оставит уповающих к нему верою и терпением. Рече бо Господь: «В трпении вашем стяжите душа ваша» (Лук. 21, 19). «Претерпевый до конца спасется» (Мф. 24, 13). Что же Павел апостол ко Евреем пишет: «Не обидлив Бог забыта труда вашего и любве, ю же явите во имя его ради» (Евр. 6. 10). И сего ради, братие, молю вашу любовь, всяко испытаю ходите с подвигы всяцеми духовными, с смирением же и молитвою прилежною, с алканием же и труды всяческыми духовными крепко духовная крила вперивше, постигающе свое исповедание Евангельскаго великаго слова страхом ныне себе оградивше глаголющим: «Никтоже руки взложи на рало, и зря вспять, управлен есть в царствии небесном» (Лук. 9. 62) Сего ради молюся в сем да будите образ жития честнаго мирскым от вас; свершением бо житием и непорочным и беззазорным по всему подобает нам быта.


9. О пиянстве и безчинии

Молю же вас, пиянство безмерное и безчиние всякое отънуд да не будет в вас. Великаго бо Христовых уст проповедника Павла слова не забывайте: «Пияницы Царствия Божия не наследят» (1 Кор. 6.10). Господь же, провзвещая преждереченная, всем заповедает, глаголя: «Блюдитеся, да не отягчают сердца ваша обядением и пиянством, и печальми житейскими» (Лук. 21, 24), Исаия же окаляя в вине пребывающия, глаголаше: «Горе квас гонящим и ждущим вечера: вино бо я (их) сожжет»; и паки: «Прельщени суть, заблудили суть». Иоиль же такоже вопиет: «Истрезвейтеся, упивающейся от вина, плачете и рыдайте вси пиющии вино в пиянство» (гл. 1, 5) Плакатися и рыдати повелено есть пиянство любящим. Сего ради и вспоминаю вам, братие, яко да не от нашего начала имя Божие похулится и одеяние великаго Ангельскаго образа зазрится к нашему вечному осуждению.

Еще же молю тебе, о Игумене, и всю братию:


10. О женском вхождении

Да пребудет в сей обители ни коими делы хождение женскаго полу. Поминайте же Господне слово, еже рече: «Всяк, взревый на жену с похотию, уже прелюбы створи с нею в сердцы своем» (Мф. 5, 28). И Приточник рече: «От жены начатой греха бысть, и того умираем вси». И по святых Отец учению, еже рекоша: «Всяк грех приходит от видения, а иде же видение, ту и помышление, и дело неподобное, от него же да избавит нас Христос Бог наш своею благодатию. Смотрите же своего спасения како тии святии Отцы написаша 5-м соборе, канон 46 ни в мужеском монастыри жена, ни в женском муж да не седит. Вся бо причтения и сблазн не буди в врных, но еже благообразно и угодно Господеви и себе благоисправити житие. Аще ли кто не сице сдеет, или клирик, или простец, да отлучится. Тако ж и святый Исаак рече: «Лучше тебе есть яд смертен, и ежели с женою ясти, аще будет мати или сестра по плоти». И святый Маркиан рече: «Боле есть с дияволом беседовати, паче нежели женам блудницам безсрамным; и с диаволом часто быти, нежели с благообразными женами, скоро бо преложно есть человеческое естество, и добро небрегше, удобие на зло прелагается», рече бо Господь: «Иже любит отца или матерь паче мене, несть мне достоин, иже любит сына или дщерь паче мене несть мене достоин» (Мф. 10. 37). Тако бо нам божественнии Отцы предаша, и ненавидяще рода нашего, сице надлежим к ним, да не будет. Се бо бесовское есть дело, еже ненавидети и укоряти Божие здание, от них же и мы рождени есмы; но сея ради вины божественныя Отцы разсмотриша: «Соль, – глаголюще, – от воднаго естества бытие имать, но егда пакы приближится к воде, абие в небытие расходится: сице убо, рече, мужеский пол вину имать с женским». Еще ж и сие, да не имате животное от женскаго пола, на потребу служебную в монастыри никако же, ниже в селех.


11. О младых детех

Яко же никого же от Отец наших, ибо то самое естество не подобает, тако же и детей малых не приимати в обитель, еже учити их книгам. Рече бо некий старец: «Не приводите детей семо, три бо церкви пусты беша детий деля». И ин старец рече: «Егда видите дети, возмите милоти ваша и побежите». Убо блаженный Сава Иерусалимский Архимандрит, освященный от чрева матере своея, глаголаше к приходящей братии младым.


12. О иноках голоусых

Чадо, не лепо есть паче же пакостно сицевей Лавре без брады имети кого. Се бо и старей скитскии Отци уставиша, и мне предаша Евфимиева чадь: «Хотящу бо ми в Лавру его влезти; видев мя голоуса, посла мя к блаженному Феоктисту, глаголя, яко неподобно есть и пакостно голоусу в Лавре пребыти. И ты иди ко отцу Феодосию, и ту имаши потребен быти. Аще убо они велиции мужи тако бояхуся преслушати заповеди святых Отец, кольми паче нам подобает? И егда возбраняет что святыми книгами? Вы же, братие, не противитеся святому писанию, за неже еже устависта они Святым Духом, а не плотскым разумом; и бойтеся того, еже рече господь: «Иже речет хулу на Дух Святый, не отпустится ему ни в сем веце, ни в будущем» (Мрк. 3, 29). Не токмо же учения ради не приимати их, но ни послужения ради, но самы работайте Господеви со страхом и радуйтеся Ему с трепетом (Псал. 2, 11), с чистотою и с верою и любовию, яко же выше речено есть, да мзду от Господа вси приимите, яко же Господь рече: «По вере вашей буди вама».


13. О бани

Еще же о сем вспомяну: да не будет же в сей обители баня, еже кому измывати тело свое. Тако бо заповедавшим святым Отцем нашим Антонию же и Пахомию, Амону же и Серапиону и прочим Отцем сице, яко да никтоже от инок кроме великия болезни или нужда обнажит тело свое, ни самому бы не видети; обретаем же и тех ради нужных потребы и служения, хотящих реку перейти и кораблю не сущу, и ни от кого видими стыдяхуся последующаго им Ангела и на ня сияющаго солнца, еже нагы зретися им от луча солнечныя. Аще ли случашеся от Отец реку прейте и учеником его с ним сущу, не обнажаху себе, дондеже друг от друга далече разыдестася, яко да не друг друга наготу видят. Аще ли се неверно будет вам, мы же явим делом· Великий отец наш Феодосий сзда великой монастырь, но без воды бысть нужда велика братии безводием; и повеле Великый всей братии пост прострещи паче обычнаго, такоже и молитву, и сбысться Давидово слово, еже рече: «Взваша праведнии и Господь услыша их» (Псал. 33, 18) и дает им Господь; с горы убо высоки, яко дострелить, искипе вода сладка, и молившимся братии Игумену Феодосию, да сзиждут баню близ Богом дарованного источника; Игумен же, помыслив, от немощи братии и труда их ради повеле; и бысть баня. Яко измышася единою точию, усьше таковый и толикий источник. И много молися Преподобный Отец наш Феодосий и не бысть воды, дондеже повеле разорите баню, и паки дасть Бог воду.


14. О иманьи от Игуменов руки

А одеяние или обувь потребное имати у Игумена, или у Иконома известна мужа правоверна и благочестива, кому повелит Игумен и братия держати всю казну монастырскую; у того имати обычны сермяжное, а не немецких сукон, а шубы бораньи носите без пуха, поминающе Евангельское слово, еже рече: «Мягкая носяще в домех царских суть» (Мф. 11, ст. 8). По старческому слову смирите прежде тело; по малу телу смиряему, смирится с ним и душа; а лишних одежд не держати.


15. О церковнем сходе

А о церковном прихождении: егда услышавше клепание ть (тот) час воспрянути аки от огня или от змия; или на молитве кто стоя будет, или на поклонех, или на рукодельи, все оставль и тамо обрестися в начале пения; зане же аще и всю нощь стоиши в келлии своей на молитве, не сравнятися единому «Господи помилуй», общему; и стояти с братиею до отпуста не отходя разве нужи, и стояще глаголати молитва: «Господи, Иисусе Христе Сыне Божий, помилуй нас», да не лишени будете ангельскаго знамения или написания. А в церкви по правилу и по уставу святых Отец да поют с тихостию и разумно, а не козлогласованием.


16. О послании на службу

А на службу иде же послет Игумен коего инока, без всякого ослушания да идет, с молитвою и с благословением, а без благословения Игумена на своя вещи никакоже не ходити ни куды ж.


17. А без благословения Игуменя не исходити

Аще кто вопреки начнет глаголати Игумену, и воздвигати свары, заперт таковый да будет в темници, донде же покается; а не покориваго мниха по пръвем и втором и третьем наказании, по святаго Великаго Василия слову, да выженут вон из монастыря, яко гнилый уд от здраваго тела. И да не вдадут ему от внесеннаго в монастырь ничто же, да не вы будете вина погыбели его. Аще он что возмет без благословения или мало или велико, вторый Анания с Сапфирою есть, и блюдитеся тояжде казни от Бога, яко же они прияша.


18. А данаго в дом не сочить назад

Аще же, вышед из монастыря, начнет мирскыми людми крамолу вздвизати на Настоятеля духовнаго и на братию, от таковых убо мирскым, по правилом святых Отец, не достоит вступатися в таковыя вещи: занеже он сам принеслся своею волею, душею и телом в жертву Богу; тако ж и имение свое дал Богу и Святей Церкви и братии, и уже несть егово, но церковное, и ныне забыв свой обет, то худое именийце просит назад. Но яко же несть лепо мертвецу из гроба исходити до общаго взстания, тако же и иноку из обетнаго монастыря исходити, или имение свое нарещи, или назад просити. И якоже сей, тако ж и поборницы его по святых Отец преданию, яко преобидницы Церкви Господня, судятся.


19. О обидящих церкви и монастыри

Смотрите ж и слышите разумне[4] обидевшая Божия святыя церкви, и на священныя их власти даное Господеви в наследие вечных благ, и на память послѣдняго рода обидящих власть, и тем даемо, беззаконно отнимая села и винограды. И аще ли кто и сану приобидети начнет, или в суды восхищати церковныя, и оправдая или привлачая насилием Епископы, или попа или диякона, и всякаго, просто рещи, священьскаго, или монастырем преданое, граблением и насилием дея и отъимая от них, все данное Господеви. Аще кто изобрящется се творя и безчинием велиим мятый святыми церквами, четверицею да в даст пакы вспять Церковное. Аще ли саном грдящиися негодовати начнут нашего повеления, истинным правилом непокаряющеся святых Отец, в каком ни сану буди в нас, или воевода, воеводства чужд да будет, или воин, воинства чужд. И пакы, аще велиим негодованием начнут забывше вышний страх, и облекшися в безстудие, повелевает наша власть тьх огнем сожещи, и домы их святым Божиим церквам вдати, их же обидеша. Аще ли сами те, венец носящий, в тыя же вины последовати начнут, надеющесь богатстве и благородстве, а истоваго нерадяще не отьдавающе, еже обидеша, святыя Божия Церкви или монастыря, преждереченному повинни да будут, по святых Отец же правилех да будут проклятии в сей век и в будущий. Вы же, братие, тоя тяготы запрещения святых Отец блюдется, да не тая же запрещения приимете, зане ж сам Господь рече святым апостолом: «Егоже аще свяжете на земли, его же аще разрешете на земли, будет связан или разрешен на небесех» (Мф.18).


[О мирском суде

Мирстии же люди судят мирским обычаем и велят вданное богу назад имати, кто что дал, и того ради тое же проклятие обои на себе подемлют, и еже Давид, проведый духом Святым, прежде глаголаше, не уведеша, ни разумеша во тме ходят и того ради Бог попущает гнев свои, овогда гладом, иногда ратью или пожаром или мором, и иными многими бедами нас оуча и приводя к покаянию милосердый Бог, апостолу убо посылающу аще наказание трпите яко сыном вам обретается Бог, аще ли без наказаниа есте убо любодеичищи есте а не сынове, и пакы рече: еже кто что всеет то и пожнет, и аще кто незаконне страждет не венчается, иже будет и зде казнь приати и тамо мука вечная, да бы ны избавил милостивый Бог.


О вкупех

И того ради смотрите братие, не было бы в сей нашей обители ни вкупа ни урока что дата яко ж в прочих обителех бывает еже на большую пакость душевную им, глаголют дающей яко свою силу ям и пию, и того ради не хощет и к церкви ити ни в келии своей молитися прилежно, и мы им сице глаголем, аще ты, брате, свою силу яси и пиеши, а который православный христьяне дают Святым церквам или землю или воду или ино что от имения память собе створяюще, а тем которая им иуда от Бога есть, блюдите не ведуще слова ни силы божия глаголет бо Иоан Златоустыи в божественной литургии, освяти любящих благолепие дому твоего, и ты их прослави божественною твоею славою, и яко же выше писано есть, и того ради, братие, пишем вам яко не установлено есть святыми Отцы вкупа просити.


О расмотрении инок

Но паче должен есть Настояи смотрети какова человека приимати, смирена бы и кротка и тиха и терпелива, его ж сам спас блажит глаголя, блажени смирении и кротции, яко таи наследят землю, инде пророком рече, на кого призрю токмо на кроткаго и смиреннаго трепещущаго моих словес, и Давид рече Господи виждь смирение мое и труд мой и отпусти вся грехи моя, таковыи бо есть дражии злата и сребра, таковаго и вы приимите в обитель но не вскоре разве по трех летех или наипаче, да и зде мирно поживете и онамо царство небесное приимите.


О странноприимстве

Еще ж и о странных прихожении вспомяну, егда приходят к вам странный или иноцы или мирстии всяко потщитися прията или покоити страннаго, аще взможно бы по господни заповеди еже сам створи преклонь бо честноую свою выю умы нозе оучеником, тако рече и вы длжни есте творити, и паки рече, странен бых введосте мя, и еликому любо пребыти ти восхощет да пребудет по завещанию святых Отец три дни и на дело не нудите его ни слова тяжка рцете ему, егда будет сам Христос или ангел его и отпущающе же дадите милостыню елико по силе, тако ж аще и мирстии жители или властители честь вздадите ему, пишет бо апостол Павел не будите должни человеком, вздадите убо ему же честь честь, ему же урок урок, ему ж дань дань и прочее, тако ж и от ловец или от коих делателей.


О подаянии от обители (в Вел.ч.м. по огл. О подаянии от

общины)[5].

Не станет у него хлеба и пришед начнет начнет прости дадите ему елико требует, а еже кто и хощет купити на денги никакоже тако оучинте, но туне давайте, слышахом убо от самовидец, яко в Святей горе и в прочих великых обителей от древних святых прияли устав, иже кто продает хлеб печеный под запрещением великым таковыи, все бо божие есть, или хлеб или риза иди злато или сребро, не внесохом бо в мир сеи ничтож, ни изнести что можем, о прочих же добродетелех яко да взираете на таковый устав Великаго Василия, апостолом вмале равно стоятеля, и Афанасия святаго божиа жилища и Григория Богослова непобедимаго христова воина, и велегласнаго Лествичника, духовным степенем утвердителя и ина иных многых предания иночьству богоносных Отец данное от них нашему чину образование, о имени Господа нашего Иисуса Христа рекшаго без мене не можете творити ничтожь, сего помощника и наставника призвавше сказати начнем, еже по силе что есть внимание и пакы како Богоу хотящу исправите сие.


О постех четырех

О посте ж якоже святей уставиша сия святыя соборны посты четыре великая четыредесятница и рожества Христова пост и святых апостол, и успению Пречистыя якоже рече се никому ж от христиан оставляти или кроме уставленных творити никако же, иже в Гангре собора правило осемьнадесятое аще кто от вздержащихся кроме телесныя нужда разгордится и преданыя посты в общину хранимыя от церкве разрешает тверду сущу в нем и свершену помыслу, анафема да есть, аще сам Христос постился дни четыредесяти, колици же мы длжны есмы поститися и поклоны творити своего ради сгрешениа, да чисти приступим к чистому источнику бессмертному, и вкусим его с верою яко же Давид рече, вкусите и видите яко благ Господь, и паки рече приступите к нему и просветитеся и лица ваша не постыдятся, слышите же братие и се яко аще кто дерзнет помыслити благое се уставление иже от святых Отец уставися или общину разорите или преобидети или превратите лукавым обычаем, аще зде правил святых Отец положеная, и вы боитеся того еже Давид рече, проклятии уклоняющиеся от заповедей твоих, и паки Павел апостол аще агнел благовестит вам не якоже мы благовестихом вам, проклят да будет.


О укорех братии

Еще же и о сем вспоминаю любви вашей, аще который брат принесет что в монастырь сей или от сребра или от иныя вещи, да не величается на непринесшаго ничтож, ни словеси тяжкаго не речет ему, да не отщетится приношения своего, зане ж все божие есть, наг родися и нагу поите света сего, аще ли силно что ничне ж навидити ино по прьвом и по втором и по третьем наказании, аще того не лишится и не кается, повелеваю самого изврещи из монастыря аки гнилыи уд от здраваго тела по реченому от Господа, аще око твое или рука твоя или нога твоя сблажняет отсецы ю, луче есть единым оком или рукою или ногою внити в царство небесное, неже два ока или две руце имуще ввержену быта в геону огненую и прочее].

Примечание. В житии Преподобнаго Евфросина упоминается, что он путешествовал в Константинополь, и что по возвращении своем в Россию имел состязание о сугубой Аллилуия, якобы в церкви Константинопольской тако чтомой и певаемой. О чем писал он к Архиепископу своему Преосвященному Евфимию, и что сей во опровержение заблуждения его сочинил послание довольно по тогдашнему времени удовлетворительное и благоразумное. Оба сии послания, как Преподобного Евфросина, так и в ответ на оное преосв. Евфимия, находятся в конце устава его. Но в свитке, припечатанном к Служебнику, изданному 7175 (1667) между прочим о сем сказано так: «К сим же заповедуем о еже писано в житии Преподобнаго Еѵфросина от соннаго мечтания списателева о сугубой Аллилуия, да никто же тому верует, зане все то писано блядное (лживое) есть от льстиваго и лживаго списания писано, на прелесть балгочестивым народам».

От святых писаний списание отца Нила (Сорскаго).

Смотр. «Истор. Росс. Иерархии», часть V, стран. 215–355[6].


Текст приводится по изданию: Епископ Амвросий (Орнатский). Древнерусские иноческие уставы, Москва, 2001.



[1] При сличении текста, опубликованного Преосв. Амвросием с текстом, опубликованным в 1902 г. Н. И. Серебрянским (Монастырский устав прп. Ефросина Псковского. Псков. 1902) были обнаружены как незначительные разночтения, так и весьма существенные пропуски, вызванные, очевидно, тем, что ученый иерарх пользовался неисправным списком. Пропуски восполняются в тексте в квадратных скобках. – прим. сост.

Списано сие из книги Софийской Новгородской библиотеки – в 4, в коже на корне на бумажке надписано «Житие и чудеса Евфросина Псковского древлеписанная. Преп. Ефросин родился в 30 верстах от гор. Пскова в селении Видельпском и при святом крещении наречен Елиазаром. Кто ж были родители его – неизвестно. Еще в отроческих летах, когда они по изучении его грамоте, предположили сочетать его браком, удалился он от дому их, и уже по кончине отца своего пришел в Рождественский Снятогрский монастырь (3 поприща от Пскова над рекою Великою) и при пострижении там в монашество переименован Евфросином. Строгая и добродетельная жизнь его вскоре обратила на него внимание и уважение монашествующих Снятогорския обители и прославила его пред прочими, почему Преподобный, желая избежать молвы сея, удалился в пустынное место на реку Толву в 25 верстах от города Пскова и вселился там в 6933 или 1425 году; потом вскоре, когда довольное число собралось к нему иночествующих, по чудесному откровению, соорудил церковь во имя трех святителей Василия Великого, Григория Богослова и Ионанна Златоустого и устроил общежительный монастырь. Поелику место, на котором церковь сия построена, окружено было отовсюду водою реки Толвы, и занимало весьма малое пространство, так что негде было поставить келлий для всех монашествующих, то один проток реки сей засыпали песком близ лежащей горы, отчего и доныне река сея течет одним стержнем. Преп. Евфросин путешествовал в Константинополь и пришед в Россию имел великий спор о трегубой Аллилуиа (о сем послание его к Архиепископу Новгородскому и сего ответ смотри в конце устава его). Преставился 6989 (1481) года Майя 15 дня на 95 году от рождения своего, и погребен между церквами Трехсвятительскою и Рождественскою. Он был росту средняго, телом сух, глава была круглая и брови кругообразные, лицо продолговато, взгляд тихий, брада длинная, густая с сединою, в конце раздвоившаяся.

[2] Здесь и далее Преосв. Амвросий, по обычаю своего времени, указывает главу и стих Священного писания. В древнем тексте, разумеется, таких сносок не было – прим. сост.

[3] Тут в подлиннике вытерлось.

[4] Здесь Преп. Ефросин ссылается на Правило 5-го всел. собора, глав. 58, но онаго в Кормчей Книге не обретается.

[5] Прим. Серебрянского.

[6] Мы не воспроизводим здесь текст устава прп. Нила Сорского. В нашем издании приводятся уставы киновийные, скитские же уставы требуют отдельного рассмотрения и издания Прим. сост.

10